Ofishin hukumar Bada Agajin Gaggawa ta Ƙasa NEMA a jihar Lagos ya ce sun karɓi ƴan Najeriya 180 da aka dawo da su gida daga ƙasar Libya.
A wani saƙo da hukumar ta wallafa a shafinta na X da ake kira da Twitter a baya ta ce waɗanda aka dawo da su gidan sun hada da mata 67, maza 55, ƙananan yara 42 sai kuma jarirai 16.
NEMA ta ce mutanen sun iso filin jirgin saman Murtala Muhammad dake Lagos da misalin ƙarfe 07:30 na daren ranar Laraba a cikin jirgin saman kamfanin Al-buraq.
Mutanen sun samu nasarar dawowa gida da taimakon hukumar lura da ƴan gudun hijira ta Majalisar Dinkin Duniya baya da suka nuna sha’awarsu ta dawowa bisa raɗin kansu.
