Asalin hoton, Getty Images
Juventus ta koma rashin kokarin da ta fara a kakar bana, inda ta sha kashi da ci 2-1 a gidan Hellas Verona a gasar Serie A ranar Asabar.
Verona ta ci kwallon farko minti 11 da fara tamaula ta hannun Giovanni Simeone, kuma shine ya kara na biyu minti uku tsakani.
Juventus ta zare kwallo daya saura minti 10 a tashi daga wasan ta hannun Weston McKennie.
Kawo yanzu an ci Juventus kwallo 15 a wasa 11 da fara gasar Serie A ta kakar nan, karon farko kenan tun 1961/62.
Haka kuma kungiyar Turin ta zura 15 a raga, bayan da ta yi nasara a karawa hudu da canjaras uku aka doke ta wasa hudu, bayan fafatawa 11 a Serie A.
A tsakiyar mako Juventus ta yi rashin nasara a hannun Sassuolo a gasar Serie A, bayan da ta buga karawa tara a jere ba tare da an doke ta ba a dukkan fafatawa.
Kafin sauran kungiyoyi su karkare karawar mako na 11 a babbar gasar Italiya, Juventus tana ta takwas a teburi da makinta 15.
Ranar 6 ga watan Nuwamba, Juventus za ta karbi bakuncin Fiorentina a wasan mako na 12 a gasar Serie A.
Kafin nan Juventus za ta fafata da Zenith St Petersburg a wasa na hudu na cikin rukuni a Champions League.
(BBC Hausa)
