An yi jana’izar tsohon mai ɗaukar hoto na gidan talabijin na Channels, Kani Ben, a ranar Asabar a garinsu Kangling da ke ƙaramar hukumar Girei a jihar Adamawa.
Marigayin, mai shekaru 44, an haife shi a ranar 28 ga Mayu, 1982. Ya rasu a ranar 15 ga Fabrairu, 2026 bayan jinya sakamakon raunukan da ya samu a hatsarin mota.
Hatsarin ya faru ne a kan hanyar Yashi zuwa Yelwan Duguri a ƙaramar hukumar Alkaleri ta jihar Bauchi. Lamarin ya auku ne yayin da tawagar ‘yan jarida ke kan aiki na rufe bikin ƙaddamar da wani aiki na Hukumar Raya Yankin Arewa Maso Gabas (NEDC).
Mutane 14 ne hatsarin ya rutsa da su, ciki har da ‘yan jarida 13 daga kafafen yaɗa labarai daban-daban. Kani Ben shi ne kaɗai wanda ya rasa ransa a hatsarin.
Tun da farko, tawagar ta miƙa aikin makarantar sakandare ta gwamnati da ke Yelwan Duguri ga gwamnatin jihar Bauchi. Ministan ƙasa na harkokin raya yankuna, Alhaji Uba Maigari Ahmadu ne ya jagoranci tawagar, tare da mataimakin gwamnan Bauchi, Auwal Jatau.
An Birne Ɗan Jarida Kani Ben A Adamawa
