Shugaban Amurka, Donald Trump, ya bayyana cewa ƙasarsa na da isassun makaman yaƙi da za su iya wadatar da ita na dogon lokaci, yana mai cewa Amurka a shirye take ta yi nasara a duk wani rikici da zai taso.
Trump ya bayyana hakan ne ta cikin wani saƙo da ya wallafa a shafinsa na Truth Social. A cikin saƙon, ya yi magana kan abin da ya kira tarin makamai da Amurka ta mallaka.
Ya ce ana iya tafiyar da yaƙe-yaƙe na tsawon lokaci ta amfani da waɗannan makamai kaɗai.
Ya kuma rubuta cewa, “Amurka na da tarin makamai marasa iyaka, kuma a shirye take ta yi nasara babba,”.
Trump ya kuma yi zargin cewa tsohon shugaban ƙasa, Joe Biden, ya bai wa Ukraine makaman Amurka masu ƙarfi da yawa.
A ƙarshen wa’adin mulkinsa na shekaru huɗu, Biden ya amince Ukraine ta yi amfani da makamai masu linzami na dogon zango irin su ATACMS, waɗanda ke iya kai hari har nisan mil 190, wato kusan kilomita 300.
Amurka Na Da Isassun Makaman Yaƙi Har Abada, A Cewar Donald Trump
