Jonah Jang, tsohon gwamnan Jihar Plataeu, ya yi alkawarin goyon bayan Atiku Abubakar, dan takarar shugaban kasa karkashin tutar jam’iyar PDP, tare da sama masa akalla ƙuri’u miliyan biyu daga jiharsa domin tabbatar masa da nasararsa a zaben 2019.
Jang ya bayyana haka ranar Litinin lokacin da yakewa magoya bayan jam’iyar jawabi a wurin taron gangamin yakin neman zabe a Jos babban birnin jihar.
Ya ce: ” Plataeu ta PDP ce haka ma PDP ta jihar Plataeu ce.Za mu tabbatar da cewa mun bawa, Alhaji Atiku Abubakar dantakarar shugaban kasa na jam’iyar kuri’u miliyan biyu a zaben dake tafe.”
Tsohon gwamnan ya zargi gwamnatin tarayya ta jam’iyar APC da jawowa kasarnan koma baya ta hanyar kawo wasu tsare-tsare da manufofi marasa inganci.
Ya yin da yake bayyana amincewarsa cewa PDP zata lashe zaben shugaban kasa, ya shawarci Jam’iyar APC da su shirya amincewa da sakamakon faduwa.