Rundunar ‘Yan Sanda Jihar Bauchi ta kama mutane biyu da ake zargin sun yi jerin fashi da satar kayayyaki a cikin garin Bauchi.
CSP Ahmed Mohammed Wakil, Jami’in Hulɗa da Jama’a na rundunar, ya bayyana cewa kama waɗannan mutanen ya kasance wani ɓangare na ƙoƙarin da rundunar ke yi don dakile ayyukan ‘yan fashi da tabbatar da tsaron rayuka da dukiyoyi a jihar.
Wakil ya ce, a ranar 22 ga Oktoba, 2025, da misalin ƙarfe 2 na rana, jami’an da ke C’ Division Police Headquarters, Bauchi, sun karɓi rahoton wani fashi daga Na’ima Saleh, mai shekaru 30, mazauniyar Nursing Quarters, kusa da Muda Lawal, Bauchi.
Na’ima ta bayar da rahoton cewa da misalin ƙarfe 11 na safiya a wannan rana, wani ɗan fashi mai suna Abdulmalik Ismail, mai shekaru 19 daga Karofin Madaki, Bauchi, ya ketare shingen gidanta, ya shiga cikin kicin ɗinta da wuka a hannu, inda ya yi ƙoƙarin sace kayanta.
Mai rahoton ta yi ƙara inda ta ja hankalin makwabta waɗanda suka bi bayan ɗan fashin suka kama shi. Bayan bincike, ‘yan sanda sun samu wayar hannu ta Redmi wacce ake zargin an sace ta ne.
Binciken ya nuna cewa wayar ta kasance mallakar Sadiyya Kabir, mai shekaru 30 daga Bauchi, wacce aka sace wayarta da wuka a ranar 16 ga Oktoba, 2024, inda ɗan fashin ya ɗauki wayar tare da rasidin sayan ta da kwalinta.
A yayin tambayoyi, Ismail ya amsa laifuffukan da ake zarginsa da su kuma ya bayyana sunan abokin aikinsa, Abubakar Saleh, mai shekaru 20 daga unguwar Doya, Bauchi, wanda daga bisani aka kama kuma ya amsa hannu a laifin.
Abubuwan da aka samu daga hannun waɗannan ‘yan fashi sun haɗa da:
Babur Jincheng guda ɗaya
Wukake biyu
Wayar hannu Redmi guda ɗaya
An mika shari’ar zuwa State Criminal Investigation Department (SCID) don ci gaba da bincike da shari’a.
Ƴansanda Sun Kama ‘Yan Fashi Guda Biyu a Bauchi
