Jami’an rundunar ƴan sandan Najeriya sun kama wasu mutane 9 da ake zarginsu da sayen kuri’a da kuma mallakar kuri’ar da aka riga aka dangwala.
A wata sanarwa ranar Asabar, Muyiwa Adejobi mai magana da yawun rundunar ya ce mutane 6 da ake zargi an kama su ne a makarantar sakandaren Aibotse dake kusa da otal ɗin Meremu a garin Auchi inda ake zarginsu da sayen kuri’a.
Adejobi ya ce mutanen da ake zargin an same su da kuɗaɗe masu yawa, tarin makamai da kuma bayanai kan yadda suka tsara tayarwa da masu kada kuri’a hankali.
Har ila yau rundunar ta samu nasarar kama wani ɗan jarida na bogi dake tare da mutanen.
