Rundunar ƴan sandan jihar Lagos ta tabbatar da mutuwar, Nwanne Ogbonaya wani lebura mai shekaru 45 bayan bulo ya faɗo masa a wurin aikin gini.
Mai magana da yawun rundunar, Benjamin Hundeyin ya faɗawa kamfanin Dilalancin Labaran Najeriya NAN a Lagos cewa lamarin ya faru ne a ranar Juma’a da misalin ƙarfe 04:30 a Opebi dake Ikeja.
Hundeyin yace yayan marigayin ne ya kai rahoton faruwar lamarin ofishin ƴan sanda.
A cewarsa Ogbonaya na aiki ne a wurin wani gini da ake rushe tsoho ake gina wani.
“Kawai sai gini ya faɗo masa yaji masa raunuka ya suma,”
“An garzaya da shi asibitin koyarwa na jami’ar Lagos inda likita ya tabbatar da mutuwarsa,” a cewar Hundeyin.
Ya ƙara da cewa ana cigaba da gudanar da bincike kan lamarin.
