Jami’an bijilante a jihar Legas sun samu nasarar kama wasu ƴan uwa biyu dai-dai lokacin da suke sace wayar wata na’urar bada hasken wutar lantarki wato taransifoma.
An kama mutanen ne a layin Onitiri dake unguwar Abule-Egba a birnin na Lagos.
Bayan kama su jami’an na bijilante sun miƙa su ofishin ƴan sanda na Oko-Oba.
Rundunar ƴan sandan jihar Lagos ce ta tabbatar da faruwar lamarin a cikin wani saƙo da ta wallafa a shafinta X da aka fi sani da Twitter a baya.
