Wani ƙwararren masani kan tsaro ya bayyana damuwa kan shirin Gwamnatin Jihar Katsina na taimakawa wajen sakin mutane 70 da ake zargi da aikata laifukan fashi da makami, yana mai cewa matakin na iya janyo manyan matsalolin tsaro nan gaba.
Da yake magana da manema labarai, tsohon kaptin na soja kuma masani kan tsaro, Abdullahi Bakoji, ya ce shirin na iya samar da kwanciyar hankali na ɗan lokaci, amma zai iya lalata tsarin adalci da amincewar al’umma na dogon lokaci.
Bakoji ya ce: “Abin da Gwamnatin Jihar Katsina ke yi shi ne neman rage tashin hankali a yanzu, amma akwai barazana cewa hakan zai iya haifar da manyan matsalolin tsaro nan gaba.”
Ya ƙara da cewa tattaunawar sulhu na iya taimakawa wajen sakin waɗanda aka sace, amma sakin mutanen da ake zargi da aikata manyan laifuka dole ne a yi shi da taka-tsantsan.
A cewarsa, sakin waɗanda ake zargi ba tare da cikakken bayani na doka, hanyoyin sa ido da kuma matakan hukunci ba na iya raunana tsoron doka, tare da ƙarfafa masu aikata laifi.
Ya ce idan jama’a suka ga ana sakin masu laifi ba tare da hukunci ba, hakan na aika saƙon da bai dace ba, kuma yana iya sa ƙungiyoyin laifi su ɗauki tashin hankali a matsayin hanyar cimma buƙata, ba abin da ke jawo hukunci ba.
Gargaɗin na zuwa ne a daidai lokacin da jama’a ke nuna ɓacin rai kan wata wasiƙa da aka samu, wadda ke nuna cewa Ma’aikatar Shari’a ta Jihar Katsina ta rubuta wa Babban Alkalin Jihar domin neman taimakon Kwamitin Sa-Idon Harkokin Shari’a (ACJMC) don sauƙaƙa sakin mutanen 70 da ake tuhuma da laifukan ta’addanci da fashi da makami a sassan jihar.
Sai dai Gwamnatin Jihar Katsina ta kare shirin, tana mai cewa yana daga cikin ƙoƙarin ƙarfafa yarjejeniyar zaman lafiya da ƙungiyoyin ‘yan bindiga da ta bayyana a matsayin masu tuba.
Masani Ya Gargaɗi Gwamnatin Katsina Kan Shirin Sakin Mutane 70 da ake Zargi da Fashi da Makami
