Mallam Ibrahim Shekarau ya fice daga PDP

Tsohon gwamnan jihar Kano Ibrahim Shekarau ya fice daga jam’iyyar adawa ta PDP.

Tsohon gwamnan ya bayyana wannan matakin ne ta hannun kakakinsa Mallam Sule Ya’u Sule, wanda ya shaida wa BBC cewa ya dauki wannan matakin ne saboda yadda uwar jam’iyyar ta dauki matakin rushe shugabancin jam’iyyar a jihar Kano.

Rikici ya kunno kai ne bayan wani mataki da uwar jam`iyyar ta dauka na rusa shugabancin jam`iyyar a jihar. yayin da shugabannin ke cewa ba su rusu ba, wasu jiga-jigan jam`iyyar su ma sun ce ba su yarda da rusa shugabannin nasu ba.

A karshen makon da ya wuce ne hedikwatar jam`iyyar PDP ta sanar da rusa shugabannin na jihar Kano.