Jihar Neja Ta Yi Rajistar Mutane 289 Da Suka Kamu Da Cutar Amai Da Gudawa, 17 Sun Mutu

Wata annobar cutar amai da gudawa a Jihar Neja ta yi sanadin mutuwar mutane 17 tare da kama mutane 289 a kananan hukumomi 11 na jihar, a cewar Kwamishinan Lafiya na Matakin Biyu da na Uku na Jihar Neja, Bello Tukur.

Yanzu haka, mutane 9 suna kwance a asibiti.

Tukur ya bayyana haka ne a lokacin da yake jawabi ga Majalisar Dokokin Jihar Neja dangane da karuwar yawan masu kamuwa da cutar amai da gudawa a Najeriya.

Ya bayyana dabarun da gwamnatin jihar ke amfani da su wajen dakile yaduwar cutar, ciki har da kafa kwamitin musamman domin tsara ayyuka a fannonin kiwon lafiya na matakin farko, na biyu, da na uku.

A cewarsa, jihar tana amfani da fasahar zamani da tsare-tsare masu inganci wajen karfafa shirin ko-ta-kwana kan annobar.

Shugaban Kwamitin Majalisar Dokokin Jihar Neja na Lafiya a matakin Farko da na Biyu, Umar Nasiru, wanda shi ma magatakarda ne, ya gargadi al’umma da su guji duk wani abu da zai iya sa a kamu da cutar, kamar yin bahaya a fili da rashin tsafta.