Babban sakataren hukumar kula da ilimin bai daya ta duniya, UBEC, Dakta Hamid Boboyyi ya bayyana a Abuja ranar Litinin cewa Najeriya na da yara sama da miliyan 45 a makarantun firamare.
Ya shaida wa taron kwana guda tsakanin UBEC da kungiyoyi masu zaman kansu cewa Naira biliyan 100 da gwamnatin tarayya ke kashewa a duk shekara a fannin ilimin boko bai wadatar wajen gudanar da karatun ba.
Mista Boboyyi ya jaddada cewa, duk da makudan kudade da gwamnatin tarayya ke kashewa a fannin ilimi, bangaren na bukatar karin kayan aiki domin samar da ingantaccen ilimi.
Ya yi kira ga kamfanoni masu zaman kansu da su fahimci mahimmancin ilmantar da yara tun daga lokacin da suke balaga don su ba da gudummawa ga ci gaban kasa.
“Abubuwa daga Gwamnatin Tarayya kadai ba za su iya tafiyar da tsarin ba. Najeriya tana da yara sama da miliyan 45 a bangaren ilimi na farko kuma da wannan adadin muna bukatar azuzuwan da za su isa.
