Mista Godwin Esheshi wani tsohon jigo a jam’iyar PDP a karamar hukumar Etsako East dake jihar Edo ya sauya sheka ya zuwa jam’iyar APC.
Esheshi wanda ya jagoranci magoya bayansa da yawa ya zuwa jam’iyar ta APC ranar Asabar a Okpella inda Philip Shaibu mataimakin gwamnan jihar ya karɓe su.
Da yakewa mutanen da suka taru a wurin jawabi, Esheshi ya ce yanke shawarar dawowa APC bayan da suka dai-dai ta sabanin da ya shiga tsakaninsa da shugabannin jam’iyar.
Yayi kira ga masu kada kuri’a da su zabi dukkanin yan takarar jam’iyar APC a zaben 2019.
Ana sa jawabin, Shaibu ya tabbatarwa da masu sauya shekar cewa yan jam’iyar APC tamkar yan gida daya ne kuma ana musu murna da dawowa.
Ya shawarci dukkaninsu da suyi aiki da zuciya daya wajen tabbatar da nasarar jam’iyar a zabukan dake tafe.