Atiku Abubakar, dan takarar shugaban Najeriya na jam’iyyar PDP, ya lissafo jerin abubuwan da ya fi sha’awa a rayuwarsa.
Ya bayyana haka ne ta hanyar maudu’in #AskAtikuYourself, wanda ke nufin #KuTambayiAtikuDaKanku.
Abubuwan da aka tambaye shi wadanda kuma ya bayar da amsarsu su ne:
- Wanne kulob din kwallon kafa ka fi sha’awa?
- Wanne abinci ka fi sha’awa?
- Wacce waka ko kida ka fi sha’awa?
Da yake bayar da amsa, dan takarar na PDP ya ce “Arsenal ne kulob din kwallon kafar da na fi sha’awa.”
Ya kara da cewa babu abincin da ya fi kauna kamar shinkafa dafa-duka, yana mai cewa wakokin marigayi Fela Kuti su ne wakokin da ya fi kauna da sha’awar sauraro.
Atiku Abubakar ya ce lokacin da Fela ke raye, yana yawan halartar wuraren da yake waka.
Sai dai ya ce a yanzu babu mawakin da ya fi kaunar sauraren wakokinsa kamar Davido.
Ranar 16 ga watan nan na Fabrairu ne za a gudanar da zaben shugaban Najeriya, inda Atiku Abubakar zai fafata da Shugaba Muhammadu Buhari wanda ke son yin wa’adi na biyu a kan mulki.