Hakkin mallakar hoto
Getty Images
Manchester City ta lallasa Arsenal da ci 3-1 a wasan mako na 25 a gasar cin kofin Premier da suka fafata a Ettihad a ranar Lahadi.
City ta ci kwallayen ne ta hannun Sergio Aguero wanda ya ci uku rigis, kuma karo na 10 da ya yi wannan bajintar a Premier, Alan Sherer ne ke kan gaba da 11 a tarihi.
Arsenal ta zare kwallo daya ta hannu Laurent Koscielny tun a minti na 11 da fara tamaula.
Da wannan sakamakon City ta koma ta biyu da tazarar maki biyu tsakaninta da Liverpool ta daya a kan teburi mai maki 61, wadda za ta yi wasa ranar Litinin.
Arsenal kuwa ta koma ta shida a teburi, bayan da United ta doke Leicester City a ranar Lahadi ta koma ta biyar da tazarar maki biyu tsakaninta da Chelsea ta hudu mai maki 50.
Sai a ranar Litinin ne West Ham United za ta karbi bakuncin Liverpool a karshen wasan mako na 25 a gasar ta cin kofin Premier.
