Hakkin mallakar hoto
Getty Images
Hukumar gudanar da gasar Premier ta tsayar da ranar Laraba, domin Chelsea da Tottenham su buga kwantan wasan da suke da shi.
Chelsea za ta karbi bakuncin Brighton & Hove Albion karawar kwantan wasan mako na 27 a gasar ta Premier.
Brighton da Chelsea sun fafata a wasannin bana ranar 16 ga watan Disambar 2018, inda kungiyar Stamford Bridge ta yi nasara da ci 2-1.
Ita kuwa Tottenham za ta karbi bakuncin Crystal Palace a karawar farko da za ta yi a sabon filinta a kwantan wasan mako na 31.
Kungiyoyin biyu sun fafata a Selhurst Park karo biyu a bana, inda aka ci Tottenham 1-0 a Premier ranar 10 ga watan Nuwambar 2018, sannan Palace ta fitar da Tottenham a FA Cup da ci 2-0 ranar 27 ga watan Janairun 2019.
Tottenham tana ta hudu a kan teburin Premier da maki 61, ita kuwa Chelsea tana ta shida da maki 60.
A cikin watan nan na Afirilu ne Tottenham za ta buga wasan daf da na kusa da na karshe da Manchester City a Champions League.
Ita kuwa Chelsea mai buga gasae Europa League za ta fafata ne da SK Slavia Prague a wasan daf da na kusa da na karshe.
